سيناريو مشترك جمال نوري _ مهند التكريتي

سيناريو مشترك
جمال نوري _ مهند التكريتي
إحدى حلقات مسلسل (( شوفوا الحال ))
عنوان الحلقة (( معاملة نقل ))

المشهد الأول

لقطة زوم تنسحب من دخان سكارة فتظهر في الصورة شخصية (( أبو زكي )) مهموما ً يتأفأف
تدخل زوجته من الباب الجانبي .. تقترب منه وتقول :
- ها أشسويت عيني أبو زكي .. مالكيت حل لهاي المشكلة
أبو زكي :
- والله اشلون ما أشوف مشكلتنا مثل مشكلة الكهرباء ما لها حل
أم زكي :
- يامعود معقولة عندك هالكد معارف ومتكدر اتسويلنا جارة
أبو زكي :
- والله آني سألت هوايا من ربعي ويكولون هالمدير العام ميتفاهم
أم زكي :
- يلله أِش انسوي الله كريم أكوم أروح أجيبلك جاي بلكي يصحصح دماغك وتلكيلنا حل لهل المشكلة

* * *
المشهد الثاني

لقطة متوسطة
يخرج أبو زكي من باب منزله و يركب السيارة متوجها ً الى الدائرة المعنية
أبو زكي متحدثا ً مع نفسه :
- ((راح أحاول ألتقي بالمدير العام وأوضحله المعاناة الي دنعيشها من ورة بهذلة البعد والمكان بلكي يلتفت الحالنا ))
ثم يدير وجهه الى الناحية الأخرى نصف استدارة ويقول مكملا ً :
_ (( آني اللي أعرفه أللي ينقل ويتحول من مكان الى آخر يكدر ينقل زوجته وياه علقاعدة الزوجية .. معقولة يعرقل هالشغلة))
ثم يبدل كير سيارته ويستمر في طريقه
(( تنسحب الكاميرة وتظهر لقطة عامة للعديد من السيارات ))

* * *
المشهد الثالث

قبل أن يدخل الى كراج الدائرة يتوقف عند مجموعة من حماية الدائرة الـ (( إف بي إس ))
الحارس بحزم :
- وين رايح .. وعليمن جاي .. متدري ممنوع الوقوف بهذا الكراج
أبو زكي :
- والله يابة حيرة متكلي وين اوكف السيارة .. اذا انوكفها بالشارع أبو المرور يغرمنا واذا انوكفها بذاك الكراج ياخذون من عدنا ألف دينار وتعال امشي كيلومتر
الحارس :
- والله هاي مو مشكلتي .. هذا الكراج خاص بالمنتسبين


(( في هذه اللحظة يقترب شخص يرتدي دشداشة بسيارته الفارهة ويسلم على الحرس ثم يدخل ))
أبو زكي :
- عيني يابا هذا هم منتسب عدكم
الحارس :
- هذا مو شغلك .. يلله لتعطلنا .. ذاك الكراج وروح وكفها هناك
ابو زكي :
- يافتاح ياعليم يارزاق يا كريم بس لو أعرف بوجه من استفتحت اليوم ..
ثم يستدير بسيارته ويذهب الى الكراج المقابل لإيقاف سيارته

* * *


المشهد الرابع

يقترب أبو زكي من حارس البوابة وهو يمسح العرق المتساقط من جبينه ويقول لهم :
- اشيصير لو مسهل أمرنا وتخلينا نطبك هنا .. قابل راح تنكلب الدنيا
يدير الشرطي ظهره ويتظاهر بعدم سماع تعليقات أبو زكي
ثم يمضي ويدخل من باب الأستعلامات
* * *
لقطة جديدة
المكان غرفة الأستعلامات
الشخصيات عدد من المراجعين وثلاثة موظفين احدهم يشرب باستكانة شاي يدخل أحد المراجعين يتبعه أبو زكي بعد برهة قصيرة

أبو زكي :
- السلام عليكم
يرد عليه الموظف الذي يشرب استكان الشاي بنفور
- اتفضل اش رايد
أبو زكي :
- والله جاي أقابل السيد المدير العام
يرد عليه الموظف الثاني بعد انتهائه من تفتيش المراجع الذي حضر قبله بقليل
- عندك مبايل انطينا هياه
(( ثم يمد يده الى داخل جيب أبو زكي - بحركة استفزازية – ويقول له ( وقبل أن يخرج ابو زكي المبايل من جيبه ) )) :
- ووياك طلعلنا الجنسية وشهادة الجنسية والبطاقة التموينية وبطاقة السكن
أبو زكي :
- يمعود كول غيرها .. خاف دتشاقة
موظف الإستعلامات بعصبية :
- شنو دتشاقة كاعدين بكهوة .. طلع المستمسكات
أبو زكي :
- أغاتي والله متستوجب ..


الموظف يلتفت الى زميله الآخر الواقف بجانبه بحركة توميء له ليبادر الى تفتيشه ويقول له :
- عنده شي معنده شي .. أخذ منه المستمسكات وخلي يدخل
ثم ينصرف من الغرفة

* * *


المشهد الخامس

يدخل أبو زكي الى الطابق الأول ويجد حشد من المراجعين فيسأل أحدهم عن غرفة المدير
أبو زكي :
- العفو عيني .. متكلي وين غرفة المدير العام
أحد المراجعين يلتفت اليه ويجيبه :
- بالطابق الرابع
أبو زكي :
- العفو احبيب تكدر اتدليني عالمصعد ترى اخوك اول مرة يجي اهنا وكلشي ميندل
المراجع :
- يمعود هي مصعد الدرج كدامك ..اتشوفه ....(( يصمت لبرهة ثم يقول لأبوزكي )) .. دبر نفسك.
أبو زكي يمد رأسه وينظر الى أعلى الدرج ويقول :
- حيل ...معقولة أصعد أربع طوابق
المراجع يهز كتفه باستهزاء يتركه أبو زكي ثم يشرع في صعود السلالم وبصعوبة بالغة (( لقطات متقطعة كلما يصل الى نهاية أحد الطوابق حيث ينظر في كل مرة الى المسافة المتبقية ويمسح عرقه المتساقط ويمضي في حركة منهكة ))
وعندما يصل الى الطابق الثالث يفاجيء بأحد المراجعين وهو يجلس على الدرج يتركه ويشرع في إكمال مشواره وعندما يصل الى آخر سلمتين من الدرج يخرج منديله ويجفف عرقه محركا ً يديه فوق جبهته مرورا ً باسفل رأسه نزولا ً الى رقبته ثم يدخلها في جيبه
أبو زكي يتحدث مع نفسه
- معقولة آني وصلت .. بس أريد أفتهم المدير العام اشلون يصعد يومية لغرفته
ثم يمسك بظهره ويشرع في اكمال آخر سلمتين ويقول بتأوه :
- يايابا انكطم ظهري .. الله يكطم ظهرهم .. معقولة اخينا بالله يزور هلدرجات يومية .. لا لا ممعقولة لازم عنده مصعد سري خاص بيه وعباد الله المساكين ..الهم الله
ثم يحاول الاعتدال في مشيته ويمضي نحو غرفة المدير العام (( تتبعه الكاميرة الى ان يصل الى الباب ))
(( ثم تنتقل الكاميرة الى غرفة المدير العام لتصور دخوله من الداخل ))
يدخل المكتب فيفاجيء بجمع غفير من المراجعين ويقع نظره على الزاوية اليسرى حيث تجلس سكرتيرة حادة الملامح يتوجه اليها
أبو زكي :
- السلام عليكم
لا أحد يرد عليه
يقترب من مكتب السكرتيرة
السكرتيرة :
- إتفضل


أبو زكي :
- أريد أقابل المدير العام
السكرتيرة :
- اشعندك
أبو زكي :
- عندي مشكلة إزغيرة
السكرتيرة :
- استريح أكعد
يلتفت يمينا ً ويسارا ً فلا يجد له مكانا ً
أبو زكي :
- متكليلي رحمة الوالديج وين أتفضل .. أشو هي صايرة علوة مال الطماطة
السكرتيرة :
- انتظر أخي .. حالك حال العالم المدير العام مموجود
أبو زكي :
- ليش مموجود .. الساعة بالعشرة مو وكت دوام (( يقولها بنرفزة واضحة ممزوجة بالسخرية ))
السكرتيرة تضرب بيدها على سطح المكتب وتجاوبه بعصبية:
- أف .. عنده اجتماع
أبو زكي :
- اشوكت يخلص
السكرتيرة :
- بعد ساعتين
ابو زكي :
- حيل .. اذا اجتماعه هالطول لعد يمته ايصيرله وكت يشوف المراجعين
السكرتيرة وكأنها لم تستمع الى عبارته الأخيرة ، يلتفت يمينا ً ويسارا ً فيجد مقعدا ً صغيرا ً مل صاحبه من الانتظار اذ يقوم منه قبل ان ينتهي الحوار بين ابو زكي والسكرتيرة (( وتصوره الكاميرة بشكل عشوائي ضمن اللقطة المعروضة ))
يتوجه الى الكرسي الصغير ويجلس عليه ثم يخرج فايله من تحت إبطه ويهف به بيده اليمنى ثم يمسح بيده على جبينه ويترك الفايل على فخذه ويضع يده على خذه ويغفو فيميل رأسه بعد برهة ٍ حتى يستقر على كتف الشخص النائم هو الآخر بجواره ويحلم

* * *
المشهد السادس (( الحلم ))

المشهد ضبابي يبدأ بالتوضح شيئا ً فشيئا ً حيث تبرز الغرفة الجالس فيها وهي فارغة من المراجعين
حيث يقوم من مقعده وتنهض السكرتيرة من مقعدها وهي تقول وتباشير الفرح والسرور على وجهها :
- إتفضل استاذ
وتفتح باب المدير العام
اللقطة داخل مكتب المدير حيث تصور الكاميرة دخوله ثم تنتقل الكاميرة لتصور نهوض المدير العام وهو يستقبل أبو زكي بحرارة حيث يتقدم أبو زكي من مكتب المدير العام ويصافحه ثم يدعوه الى الجلوس يجلس المدير العام بعد أن يجلس أبو زكي ويقرع على جرس موظف الخدمة فيأتي الموظف مرتبكا ً:
- نعم أستاد ..أأمر

المدير العام
- جيبلنا جاي .. بارد .. أي شي عندك بسرعة عندنا ضيف عزيز
(( ثم يلتفت الى أبو زكي ))ويقول له :
- والله نورت الدائرة
أبو زكي :
- بارك الله بيك أشكرك
المدير العام
- أمر .. خدمة
أبو زكي :
- والله الشغلة بسيطة .. أريد أنقل زوجتي علقاعدة الزوجية
المدير العام :
- يمعود بس هاي .. أبسط منها ماكو وين معاملتك
(( يقوم أبو زكي ليعطيه المعاملة فتهتز الصورة )).... قطع
لقطة جديدة....
الشخص الجالس بجواره ينهض بسرعة ويوشك أبو زكي على السقوط ينهض مذعورا ً وهو يهذي ويقول:
- ها أستاذ . العفو أستاذ .. ما
ثم يفتح عينيه وينظر الى الشخص الذي كان جالسا ً بجانبه وهو يرمقه بنظرة استغراب ثم يتركه ويسرع ليدفن نفسه بين جمع المراجعين الداخلين على غرفة المدير العام
تتوجه الكاميرة الى أبو زكي وهو ينظر الى ساعته ويضعها على اذنه ليتأكد من أنها تعمل ثم يقارنها مع الساعة الجدارية المعلقة على الحائط
ثم ينهض ليلحق بجمع المراجعين اللذين تركوا القاعة
يدخل ويحاول أن يحشر نفسه بينهم ليجد له مكانا ً أو سبيلا ً للوصول الى كرسي المديرالعام وبعد أن يعجز يخرج قليلا ً ليستنشق الهواء ثم يعود الى الداخل وعندما يصل الى جانب المكتب يسأله المدير بعبوس :
- ها شتريد
أبو زكي :
- .. العفو استاذ الحقيقة..
المدير العام مقاطعا ً أبو زكي :
- متصير.. مبيها مجال
أبو زكي :
- غير تفتهم آني أش أريد أكول
المدير العام :
- أف .. كول بسرعة واختصر
أبو زكي :
- استاذ أريد أنقل زوجتي علقاعدة الزوجية
المدير العام :
- عرفت آني متصير .. أمبين من وجهك جاي أتريد شغلة نقل (( يقولها بسخرية وتهكم ))
أبو زكي :
- يعني إنسانيا ً متصير أنقلها لأن حيل دي تعبنا الوضع و ..






يقاطعه المدير العام :
- أخي لتضوجني .. أتوقفت التنقلات ومراح نعمل بيها ليما اتصير انتخابات جديدة ويسّوون دستور جديد
((أبوزكي ينظر بانكسار الى المدير العام ثم يخرج من الغرفة بارتباك ))


* * *
المشهد السابع

الكاميرة قريبة من قطعة مكتب معاون المدير العام
ثم يقترب أبو زكي وهو مهموم ويرى القطعة ويضع يده على خده مع حرف وجهه قليلاً إلى الاتجاه المعاكس لمكتب المعاون ثم يتحدث مع نفسه ويقول :
- ها هذا مكتب معاون المدير العام دخل ادخل واشوف بلكت بيها مجال
يطرق الباب ويدخل بتوجس
يسمع كلمة :
- إتفضل
يدخل الى الغرفة ويقف امام المعاون المنشغل بالتحدث عبر المبايل وكأنه يتغزل بإحدى المعجبات
المعاون :
- أي عيني صار
أبو زكي :
- شكرا ً استاذ (( لقطة قريبة من أبو زكي ))
المعاون ببرود :
- مو وياك
ثم يواصل المعاون حديثه في الموبايل :
- اعتبريها خلصانة وحتى لو متصير .. اسويها ما كو شي عدنا مستحيل
أبو زكي يتحدث مع نفسه :
- والله يمكن راح ايسويلنة الشغلة
ثم ينظر الى تعابير وجه المعاون الضاحكة ويقول :
- امبين على وجهة خوش رجال مو مثل ..
ينهي المعاون مكالمته ويتحدث مع ابو زكي مقاطعا ً حديثه مع نفسه :
- اتفضل أخي
أبو زكي :
- رحت للمدير العام ووو....
المعاون :
- لعد ليش جاي علية
أبو زكي :
- شغلتي بسيطة بس المدير عقدها
المعاون :
- شنو شغلتك



أبو زكي :
- أريد أنقل زوجتي علقاعدة الزوجية ووو...
المعاون:
- يمعود هاي حيل صعبة .. أصلا ً مستحيلة
أبو زكي :
- استاد هسة سمعتك اتكول بالمبايل ماعدنا شي مستحيل
يتجاهله المعاون ويدير له ظهره ويشرع بالضغط على ارقام الموبايل ويعود للتحدث بتغزل مرة اخرى يخرج أبو زكي
* * *
المشهد الثامن
المكان : باب منزل ابو زكي
يطرق الباب ..تفتح له زوجته وتقول له :
ها بشر حمامة لو غراب
أبو زكي :
- والله يامرة كابوس .. كابوس .. يبين شغلتنا ملها جارة
(( ثم يجلس في غرفة الجلوس وتصب له زوجته قدحا ً من الما ء من الجك الموجود على الطاولة))
وتسأله :
- ليش متصير.. مقابلته للمدير العام
أبو زكي – بنرفزة واضحة - :
- ميصير .. هذا مخالف للقوانين
ام زكي :
- هاي أشبيك أبو زكي
أبو زكي وهو يحك رأسه :
- يمعودة هاي مو حجايتي .. هاي حجاية المدير العام
أم زكي تضع القدح على جانب الطاولة وتجلس بجوار أبو زكي وتقول :
- يعني شنو.. مبيها مجال
أبو زكي :
- دا اكلج شغلتج (( لاكفة طين )) يامجال
ترد عليه بانكسار:
- يعني اشلون أستقيل
لايرد عليها ويضع يده على خده ويغرق في خيالاته متجاهلا ً كلام زوجته


* * *
المشهد التاسع
المكان: مقهى
الشخصيات: عدد من الزبائن يلعبون بالعاب مختلفة و شخصية جديدة ((صديق أبو زكي ويدعى أبو عزيز ))


أبو زكي جالس في المقهى وسط عدد من الزبائن التي تتوسط المقهى وهي تلعب الدومنة والطاولي
وهو جالس في مكان منعزل يدخن مهموما ً
يدخل الى المقهى صديق لأبو زكي يسلم على الحاضرين ويشاهد ابو زكي فيتقدم منه ويسلم عليه الصديق ((ابو عزيز ))
(( يتحدث بلهجة تشبه لهجة الحاج راضي الحلاق)) _في مسلسل تحت موس الحلاق_ :
- هلو أبو زكي اشلونك ..أشو كاعد علصفحة متلعب دومنة اليوم
يرفع أبو زكي عينه ويرى ابو عزيز ويقوم ليصافحه ويجلسه بجواره ثم يسحب نفسا ً عميقا ً من دخان سيكارته ويقول :
- والله ما أدري أش أكلك .. مهموم والله ..حيل مهموم
أبو عزيز :
- شكو خير .. خو ماكو شي
أبو زكي :
- عبالنا ننقل اختك ام زكي .. بس الظاهر شغلتها متصير
أبو عزيز:
- يمعود دبحبحها معقولة
ابو زكي :
- يعني شلون أبحبها
ابو عزيز:
- صديق .. عرف (( ثم يفرك يديه إشارة الى طرق النقود ))
أبو زكي:
- ليش انت متعرف بالحال
أبو عزيز:
- أوكف .. أوكف (( يضع يده على جبينه وكأنما تذكر شيئا ً )) ثم يردف قائلا ً:...لكيتها
أبو زكي :
- كول اش لكيت
أبو عزيز:
- ابو دريد الفيتر
أبو زكي :
- فييييتر وهذا شنو علاقته بالموضوع
ابو عزيز :
- لك مو هذا إبن عمه للمدير
أبو زكي :
- يعني .. ايسوي شغل
أبو عزيز :
- لك كل الشغل يمه .. هسة اخابرلك هياه وميصير خاطرك الا طيب
ابو عزيز يخرج الموبايل من جيبه ويضغط على الأزرارثم يضعه على أذنه
- ألو الله يساعدك أبو دريد .. عدنا شغلة يمك
توقف
أبو عزيز :
- عندي صديق عزيز عليا يريد ينقل زوجته .. والشغلة يم ابن عمك
(( ينتظر قليلا ً ))
أبو عزيز :
- يعني بيها مجال ..

توقف
أبو عزيز :
- بارك الله بيك .. راح أخليه ينتظرك باجر بمكتب السكرتارية
يغلق مبايله وينظر الى أبو زكي ويقول له :
- بعد أش تريد.. وفضت شغلتك كوم خل نلعبنا داس دومنة كبل منروح لبيوتنا
(( يقومان سوية ويتوجهان نحو احدى المناضد ))


* * *

المشهد العاشر

مكتب السكرتيرة المطل على غرفة المدير العام
نفس المراجعين
أبو زكي يفرك يديه وهو ينتظر على نار وينظر الى الساعة المعلقة على الحائط
ثم يوجه بصره ناحية الباب بحثا ً عن أبو دريد (( يتحدث مع نفسه )):
- معقولة هذا يدبرها .. والله اشلون ما أشوف تيتي .. تيتي مثل مرحتي جيتي
يدخل ابو دريد وهو يلبس بذلة عمل ملوثة بآثار دهن الكريز ويسأل الموجودين عن أبو زكي
- منو بيكم أبو زكي
أبو زكي ينهض متلهفاً ويقول :
- آني أغاتي .. منو عيني أبو دريد
يتصافحان وبعد ان يدير له ظهره ليدخله معه الى غرفة المدير العام
يحرك أبو زكي يديه باستهزاء لهذه الشخصية الواقفة أمامه.. ثم يتبع أبو دريد الى غرفة المدير العام

تصور الكاميرة دخول أبو دريد المفاجيء لغرفة المدير العام يتبعه أبو زكي
يتفاجأ المدير العام بهذا الدخول المفاجي ثم يعدل جلسته وينهض محييا ً أبو دريد
المدير العام :
- يا اهلاً وسهلا ً .. إتفضل استريح
يدق جرس موظف الخدمة ويطلب منه أقداحا ً من العصير
المدير العام :
- الله بالخير
أبو زكي وابو دريد
- الله بالخير
المدير العام :
- إتفضل ابو دريد أمر خدمة
ينهض أبو دريد ويقدم إضبارة النقل ويقول للمدير العام :
- وقع هنا وقع
المدير العام :
- غير افتهم على ايش أوقع
أبو دريد :
- وقع عيني وقع لاتعقد المور هية شغلة نقل



المدير العام :
- تتدلل
لقطة مقربة من ابو زكي وهو يتذكر لقطات متتابعة للمدير العام وهو يقول (( لقطة زوم تقترب بسرعة للمدير العام ))
- متصير .. ما بيها مجال .. حسب الضوابط
ثم لقطة لوجه المعاون زوم - مقربة بسرعة – وهو يقول
- يمعود هاي صعبة حيل .. أصلا ً مستحيلة
ينهض أبو زكي متهللا ً مستبشراً ثم يخرج برفقة أبو دريد
* * *

المشهد الحادي عشر

أبو زكي في المقهى نفسه
أبو زكي جالس على احدى المساطب وهو يلعب الدومنة وهو في غاية السعادة على الجهة الأخرى وفي نفس الزاوية التي كان يجلس فيها عندما كان مهموما ً يجلس رجل يدخن بشره وهو من أصدقاء أبو زكي
يرفع أبو زكي صوته
- ها أبو سارة .. شنو هالكآبة
أبو سارة :
- لا ما كو شي .. بس هاي المعاملة مال بنتي سارة متعبتني
أبو زكي :
- يعني يمن
أبو سارة :
- يم مدير الماء والمجاري
ثم يتدخل أحد الجالسين وهو رجل في الثلاثينات من العمر بيده استكانة شاي يشرب منها قليلا ً ثم يقول :
- بسيطة .. لاتدير بال باجر أدزك على ابن عمه للمدير وميضل خاطرك الا طيب
أبو سارة :
- يمعود الحكني بيه
أبو زكي :
- وهاي هم فضت خلفالله على ولد عمام المدراء العامين لو مهمة منو يمشي أمورنا



موسيقى الختام